كتبت احلى القصايد في مناجاتك =وابدعت لكن أبد ما جيت تطريني
أتعبت غيرك وانا احكي حكاياتك=ما كن غيرك بهذا الكون يعنيني
أقيس عمري بجياتك وروحاتك=وبين الاثنين هوجاسك يواسيني
مابين صمتك وضحكاتك ودمعاتك=دورة حياتي وبيدك إنت تكويني
تزين دنياي يوم أشوف بسماتك=ويفز قلبي إذا طرفك يناديني
قي غيبتك عشت خيالاتي وخيالاتك=يا زين ذاك البعيد وساكن ٍ فيني
يطرقني عذب الصدى بأحلى عباراتك=يطربني طاريك غيره يسليني
لا جن ليلي جلست أقرا خطاباتك=ما مل قلبي ومل السطر من عيني
يا ليتني حرف ضايع في كتاباتك=يكفيني منك حبيبي بس تدويني
في الناس ماشفت من يسوى مساواتك=هذا غلا.. ولا حبك حيل معميني
عشقت درب ٍ في يوم ٍ ضم خطواتك=عشقي لوقت ٍ أجي لك فيه وتجيني
عشقت ليل ٍ سهرته في مناداتك=عشقي لليل ٍ سهرته وانت بيديني
وعشقت من عشقي لك يا زين زلاتك=مجنون لكن جنوني فيك مرضيني
سافر حبيبي أنا كلي محطاتك=لو وين ما رحت يا لغالي تلاقيني
أنا بحنايا ضلوعك بين آهاتك=بجدار قلبك كتبت آخر عناويني

عليك الشعر يسألني واكابر= ألا يا ليتني ما كنت شاعر
اعاند سطوة ابياتي الحزينه=عساي ألقى لطول الحزن آخر
أنا اللي عاش أيامه معذب=يداري احساس فالخفاق حاير
طويت الهم في صدري ولكن=عجزت أطوي معاناة المشاعر
فضحني في حضور الناس دمعي=ودمعي لاتحدر صار سافر
معك مدري علام الكون ضدي=أشوفه بالأسى ضدي يجاهر
رفض حظي الردي يرفق بحالي=علام الحظ للعشاق جاير
وحبك في حنايا الروح يسري=يعاند قلب متألم وصاغر
من إحساس الهوى ياويل قلبي=إذا مزق حنينه كل ساتر
حبيبي يا حلا قولة حبيبي = تعال بحاجتك خفّاق صابر
داوي علتي وكبت العواطف=بكلمة حب لو هي جبر خاطر
متاهات الخفوق اللي يحبك=غديت بحضنها عاشق مغامر
مضى عمري وحبك في خيالي=كتبته فوق خدي بالسواطر
يمر وقتي وأنا عاشق متيم=إذا ضاقت همومه قال باكر
متيَّم يرتجي بلسم محبه=ولكنه رغم جرحه يكابر

غزالٍ واقفٍ في ظل تله=وحيدٍ في الخلا ماله مخاوي
بديعٍ في الحلا ما شفت مثله= رغم نور الضحى بالحيل ضاوي
أناظر له بعينٍ ما تمله= ومنهو يمل حسنٍ فيه غاوي
وجفنه يا حلاته يوم سله=اذا صاب الحشا ماله مداوي
أحس بغزته غزة مسله=في قلب صاده الطرف الشقاوي
أقله عن شعوري وما أقله= ألا يا شين محبوبٍ هقاوي
أنشد خاطري ويقول خله=وقلبي يرتجف ما هو بقاوي
أشوف البعد له مليون عله= واشوف القرب من حده بلاوي
لمحته ما لقيته في محله=تلاشى والخلا أصبح خلاوي
ولا مريت يوم وشفت تله= ذكرته صاحب الثوب السماوي

ألا يا آية المولى في خلقه يا سنا من نور=جمال وعفة وطيبة ووفا سبحان خالقها
حليلة قلبي اللي تملكه بالشرع والدستور=شريكة عمري اللي ينتشي من طيب عابقها
أنا أدري ما يفي قدرك قصيد ولا تفيك سطور=ولكن روحي اشتاقت تبي ضمة معانقها
عطيتك من قصيدي اللي كتبته يا غلاي زهور=مشاعر يحترق وجه الزمان بنور بارقها
رسمتك في جدار الخافق اللي بالوفا مشهور=كتبتك قصةٍ فاقت حلومي في حقايقها
لأنك فالي الطيب نصيبي وحظي المسرور=وفرحة روحي اللي ماتبي لحظه تفارقها
أحبك قد ما ناح الحمام وغرد العصفور=أحبك لين تبدل شمس هالدنيا مشارقها
أنا كل ما لمحتك قلت يا معطي النعم مشكور=جمال وعاطفه واخلاق تمت في خلايقها

يا ونة(ن) ونيتها من حلا الروح=ونة صويب(ن) له جروح(ن) عميقه
يبات ليله يلعق الجرح وينوح=الحلم زاده والرجاوي رفيقه
لو يدري إن الحب آلام وجروح=وإن البلى إسمه مشاعر رقيقه
ما دش بحر(ن) موجته كلها ملوح=كم روح في جزره ومده غريقه
يرقى على موج الأسى غصب ويلوح=والموج ضيقه بعدها ألف ضيقه
ذي حالة اللي بدرب الأشواق مطروح=كل ما خطى خطوة ظروفه تعيقه
يهتز قلبه يوم تقولين بآ اروح= وتشب في وسط الحنايا حريقه
الخافق اللي ما سكن فيه مملوح=غيرك ولا غيرك سبايب شهيقه
أمسى يفرفر فرفرة طير مذبوح=يوم انذبح حلمه بنصل الحقيقه
يا بنت لو تدرين عن صب مجروح=ما كان غبتي عن عيونه دقيقه
العاشق اللي منهجه صدق ووضوح=والصدق للعشاق أسهل طريقه
ماله سوى شوفتك غاية ومصلوح=يا عل من عقب الظمى يبل ريقه
والله يحبك حب لو بيرقه يلوح= تفنى العداوة من قلوب الخليقة

أحبك أعشقك أهواك..أبعرف بس وش باقي=ملكتي الروح بالقوة .. وأنا لك رافع الرايه
ذبحني حبك الجارف وشوق(ن) صار خنـّـاقي= وضعت بداخلي أتبع مشاعر فيك رغايه
عرفت ان الظمى قتّال يوم إن الزمن ساقي=وعرفت إن الغرام جروح تعانق روح شكـايه
ألا يا راعي أسراب المشاعر دونك أشواقي=قطيع(ن) يتبعك لاخاطرك طاب وعزف نايه
أنا يا غايتي بعدك تعبت أدادي خفّـاقي=ترى في حالتي مابه وسيله تبرر الغايه
أسافر لك خيالٍ خصب وأعيشك داخل أعماقي= وأتوه بعالمك لأني بعالم واقعي تايه
أسامر حرفي اللي مل فضفضتي على اوراقي=تعب مني القصيد اللي يصوّر حضرتك ( آيه )
عطيتك قلب به طيبه أصيل ومعدنه راقي=عطيتك عقل ما عمري سألته فيك وش رايه
من طرفي إلى قلبي لأوردتي إلى أحداقي=مكانك وين مارحتى تمشِّي داخل اعضايه

قالت أحبك قلت أدري وش بعد=صار معنى الحب في العالم زهيد
ما لقيت من الهوى غير النكد=الأمل لو صدق تهواني .. بعيد
ما ابي قصة هوى بنت لولد=ودي أعشق عشق من نوعه فريد
ودي لا من غبت قلبك يرتعد=وجيتي تسوى بعينك ألف عيد
ودي تبكي غيم وآهاتك رعد=وكل شي(ن) فيك لجل عيني يقيد
ودي شوقك لي حبل(ن) من مسد=كل لحظة وثانية بقلبك يزيد
ودي ما يبقى غلا بقلبك لحد=دون خلق الله تغليني وحيد
ودي لو تدرين وش ودي بعد=شئ ما قلته ويفهمه البليد
كان قلبك صامل بعلمه وجلد=يا هلابك عد ما يرعد رعيد
وان رفضتي .. شر عني وابتعد=قولي لقلبك يروح يلعب بعيد

يتعدل القاف لو ما وده .. يتعدل=يكفيني إني أسطّر صادق احساسي
أفضفض جروح تنكى قبل ما تدمل=وابعثر أوهام دارت في رحى راسي
وأشرب من أقداح فكري لين ما أثمل=لا صار خمري خيالي ودفتري كاسي
أخذ من الوقت ذكرى وحلم مستقبل=للحاضر اللي توسد سطر قرطاسي
كل مره أكتب عن العشاق واتخيّل=حالي متيم سعيد ومغرم يقاسي
واليوم أبكتب عن اللي صابني في مقتل=وأحتلني بالرضى من ساسي لساسي
واساير جنون عاشق ما يبي يعقل=يموت في شوفتي ويذوب بانفاسي
لا غبت عنه يطوف بعالمي يسأل=ولا من لقاني يحط اللوم ويواسي
مجنون في العشق ومعدن غيرته أهبل=يحب ضحكي ويعشق صرَّة أضراسي
ساعة أشوفه طفل مهووس ومدلل=وساعة أشوفه رصين وكالجبل راسي
وفي كل الأحوال أشوفه أجمل وأجمل=يا علّني ما انحرم من رقة القاسي
ما أظن شعر(ن) كتبته في حضرته يكمل=وأخاف من زود حسنه أعلن افلاسي